Af þeim ellefu sem látist hafa í umferðinni á þessu ári eru þrír útlendingar. Talsmaður Umferðarstofu segir ekki einfalt að fræða útlendinga um hættur í umferðinni hér. Hann segir að vakningu þurfi meðal almennings við að uppfræða erlenda ökumenn.

Séstakt átak var gert í umferðarmálum gagnvart erlendum ökumönnum fyrir verslunarmannahelgina í sumar þegar nýtt umferðarskilti á ensku var afhjúpað. Það tiltekur að malbik endi og við taki malarvegur. Þótt þetta framtak sé vissulega lofsvert þarf augljóslega meira til.

Ljóst er að erlendir ökumenn glíma í fæstum tilvikum í heimalandi sínu við aðstæður líkar þeim sem hér eru og allra síst þegar vetur er genginn í garð. Af tveimur banaslysum þar sem útlendingar áttu í hlut var vetrarfærð.

Þann þriðja mars síðastliðinn lést tæplega fertugur Ítali er hann ók bifreið sinni út af veginum í Hörgárdal. Þann sautjánda september lést tvítugur Pólverji á Vestfjarðavegi þegar bíllinn sem hann ók fór þar út af veginum. Og nú fyrir helgi lést indversk kona á sextugsaldri er bifreið sem hún var í lenti í mjög hörðum árekstri við annan í flughálku á norðaverðri Holtavörðuheiði.

Í umferðaröryggisáætlun stjórnvalda sem samþykkt var í vor er gert ráð fyrir að verja fé til að auka öryggi erlendra ökumanna hér. Einar Magnús Magnússon hjá Umferðarstofu segir að mesti vandinn sé að ná til útlendinga sem hyggjast aka um vegina hér á landi.

Einar Magnús segir að nú sé unnið að gerð bæklings fyrir þá útlendinga sem hér búa en einnig hefur Umferðarstofa unnið fræðslumynd fyrir útlendinga um hættuna í umferðinni hér á landi.

„Vandamál tengd útlendingum eru fyrst og fremst vandamál sem Íslendingar hafa búið til og útlendingar, sem hingað hafa komið, eru fólk sem við höfuð kallað til starfa," segir Kristinn H. Gunnarsson, þingmaður Frjálslynda flokksins, á vefsíðu sinni.

Kristinn segir mikilvægt að hafa hugfast að þau vandamál, sem hafi helst komið upp á yfirborðið í kjölfar þess að tugir þúsunda útlendinga hafi flust til landsins á örfáum árum, lúti að Íslendingunum sjálfum. Það séu íslensk fyrirtæki sem séu staðin að því að borga útlendingum lægri laun, okra á þeim í húsaleigu og búa þeim óviðundandi aðstæður.

„Það eru Íslendingarnir sem standa sig ekki í því að bjóða upp á fullnægjandi íslenskukennslu, eða svelta viðeigandi stofnanir í fjárveitingum þannig að þær standa ráðþrota frammi fyrir verkefnum sínum," segir Kristinn.

Í samtali við Vísi sagðist Kristinn hafa skrifað pistilinn til að andæfa gegn fordómum í garð útlendinga sem hann telur að fari vaxandi. Hann viji viðhalda jákvæðu viðhorfi í garð útlendinga. Kristinn segist ekki vera með í smíðum frumvarp til að bæta réttarstöðu útlendinga. Ef hann sjái tiltekin atriði sem þurfi að breyta varðandi réttindi þeirra þá muni hann að sjálfsögðu taka þau til skoðunar.

visir.is

Mikil fjölgun útlendinga í Reykjanesbæ hefur varla farið fram hjá fólki enda eru útlendingar nú orðnir um 7% af tæplega 13000 íbúum bæjarins. 

Viss vandamál munu hafa fylgt útlendingunum á skemmtistöðum bæjarins sem hafa sumir tekið til þess ráðs takmarka aðgang þeirra að stöðunum. Skemmtistaðurinn Yello setti fyrir nokkru reglur sem takmarka að öllu leyti aðgang útlendinga að staðnum og eftir því sem S&S hefur heyrt hefur staðurinn að mestu verið laus við slagsmál og annað drykkjuvesen eftir að þessar reglur voru settar.

Heyrst hefur að nýr veitingastaður, sem innan tíðar opnar í Reykjanesbæ, muni setja ákveðnar reglur um aðgang útlendinga. Þar verður a.m.k. krafist snyrtilegs klæðnaðar og hugsanlega munu einhleypir útlendingar ekki fá aðgang, aðeins þeir sem hafa dömu upp á arminn.

Mynd frá næturlífinu í Reykjanesbæ