Segja Kristin standa einan

26. maí 2008

„Af hverju ætti ég að reyna að koma höggi á Magnús Þór og Guðjón,“ segir Kristinn H. Gunnarsson, þingflokksformaður Frjálslynda flokksins. Þetta segir hann um orð Magnúsar Þórs Hafsteinssonar, varaformanns Frjálslynda flokksins og varabæjarfulltrúa á Akranesi.

Magnús sagði við dv.is nú fyrr í dag að Kristinn færi rangt með í mörgum tilfellum í skrifum sínum og fullyrðingum í fjölmiðlum. „Hann er augljóslega að reyna að snúa málinu sér í hag og um leið reyna að koma sem þyngstu höggi á félaga sína í þingflokknum, formann flokksins og mig. Til þess hikar hann ekki við að beita ósannindum og rangfærslum. Hann ber fram mjög alvarlegar ásakanir um að verið sé að sá tortryggni og efasemdum í garð flóttafólks þegar við höfum ekki gert annað en að gera ábyrgar athugasemdir á félagslegum forsendum við undirbúning málsins. Ef þessum ásökunum er beint til mín, þá á það líka við um Guðjón Arnar Kristjánsson, formann Frjálslynda flokksins, sem var upplýstur um þetta mál alveg frá upphafi,“ segir Magnús Þór.

Þarna vísar Magnús Þór til pistils Kristins á heimasíðu hans á föstudag. Þar sagðist Kristinn ekki geta tekið undir málflutning sem væri til þess fallinn að sá efasemdum og tortryggni í garð flóttamanna eða drægi í efa getu einstakra sveitarfélaga til þess að taka við hópi 30 palestínskra flóttamanna frá Írak. „Ég vil hvetja til þess að menn láti af slíku háttalagi og sameinist frekar í því verkefni að sýna flóttamönnum að þeir séu velkomnir til landsins og að óskað er eftir þátttöku þeirra í samfélaginu. Umræða um einstaka þætti sem varða málefni flóttamanna er þörf en hún á að grundvallast á viljanum til þess að gefa þeim kost á því að lifa og starfa í íslensku þjóðfélagi,“ skrifaði Kristinn.

Kristinn segir ljóst að ágreiningur sé innan flokks frjálslyndra sem og þjóðfélagsins hvað varðar komu flóttamannanna á Akranesi. Samflokksmenn hans, Guðjón, Magnús Þór og Sigurjón Þórðarson hafa aftur á móti vísað því á bug. Sigurjón hefur meðal annars vísað til hvernig atkvæðagreiðsla innan miðstjórnar flokksins fór um stuðningsyfirlýsingu við málflutning Magnúsar Þórs í málinu. Þar hafi einungis þrjú atkvæði verið greidd gegn stuðningsyfirlýsingunni. Einn þeirra sem hafi greitt atkvæði hafi verið Kristinn sjálfur. Þingflokkurinn sendi aftur á móti frá sér tilkynningu á svipuðum tíma og miðstjórnin þar sem var vísað til stefnuyfirlýsingu Frjálslynda flokksins og lagt áherslu á stuðning við móttöku flóttamanna, en að betur hefði mátt standa að málum um væntanlega komu flóttafólks til Akraness og að stjórnvöld beiti sér fyrir góðri upplýsingagjöf um komu flóttamanna.

Aðspurður hvaða samflokksmenn  Kristins standi með honum í málinu, segist hann ekki vilja nefna nein nöfn í þeim efnum. „Það eina sem ég get sagt er að það er ágreiningur í flokknum og þjóðfélaginu um málið,“ segir Kristinn.

Heimild: dv.is (http://dv.is/frettir/lesa/9367)

Góður andi á upplýsingafundi

26. maí 2008

Nokkur hundruð manns sóttu upplýsingafund um komu flóttamanna til Akraness í Tónbergi. Fundinum lauk fyrir skömmu og var að sögn blaðamanns Morgunblaðsins almenn ánægja með fundinn og einungis einn eða tveir menn með efasemdir um komu 30 flóttamanna.

 

Á heildina litið voru allir sem fundinn sóttu ánægðir með framtakið og bíða að sögn spenntir eftir að taka á móti flóttamönnum. Fólk spurði hvar það gæti skráð sig til að gerast stuðningsfjölskyldur.

 

„Þessi viðbrögð komu mér ekki á óvart," sagði Gísli Einarsson og bætti því við að hann þekkti sitt heimafólk.

 

Að fundinum stóðu félags- og tryggingamálaráðuneytið, Akraneskaupstaður og Rauði Kross Íslands.  Þar gafst Akurnesingum og öðrum sem vildu kynna sér málefni flóttamanna kostur á að mæta og kynna sér málið frá fyrstu hendi.

 

Öllum spurningum var svarað og fólk þakkaði sérstalega fyrir upplýstan og góðan fund.

 

Heimild: mbl.is (http://mbl.is/mm/frettir/erlent/2008/05/26/godur_andi_a_upplysingafundi/)

„Kristinn reynir að koma höggi á okkur“

26. maí 2008

„Kristinn fer alrangt með í mörgum tilfellum í skrifum sínum og fullyrðingum í fjölmiðlum. Hann er augljóslega að reyna að snúa málinu sér í hag og um leið reyna að koma sem þyngstu höggi á félaga sína í þingflokknum, formann flokksins og mig. Til þess hikar hann ekki við að beita ósannindum og rangfærslum. Hann ber fram mjög alvarlegar ásakanir um að verið sé að sá tortryggni og efasemdum í garð flóttafólks þegar við höfum ekki gert annað en að gera ábyrgar athugasemdir á félagslegum forsendum við undirbúning málsins. Ef þessum ásökunum er beint til mín, þá á það líka við um Guðjón Arnar Kristjánsson, formann Frjálslynda flokksins, sem var upplýstur um þetta mál alveg frá upphafi.“ segir Magnús Þór Hafsteinsson, varaformaður Frjálslynda flokksins og varabæjarfulltrúi á Akranesi, um skrif Kristins H. Gunnarssonar, samflokksmanns sins og þingflokksformanns.

Tekur ekki undir málflutninginn

Kristinn skrifaði pistil á heimasíðu sína á föstudag þar sem hann segist ekki geta tekið undir málflutning sem sé til þess fallinn að sá efasemdum og tortryggni í garð flóttamanna eða dregur í efa getu einstakra sveitarfélaga til þess að taka við hópi flóttamanna. „Ég vil hvetja til þess að menn láti af slíku háttalagi og sameinist frekar í því verkefni að sýna flóttamönnum að þeir séu velkomnir til landsins og að óskað er eftir þátttöku þeirra í samfélaginu. Umræða um einstaka þætti sem varða málefni flóttamanna er þörf en hún á að grundvallast á viljanum til þess að gefa þeim kost á því að lifa og starfa í íslensku þjóðfélagi,“ skrifaði Kristinn.

Kristinn sagði enn fremur enga ástæðu til þess að einhver breyting verði á árangursríku starfi stjórnvalda og hjálparsamtaka við undirbúning og móttöku næstu hópa flóttamanna. Hingað til hafi íbúarnir í viðkomandi móttökusveitarfélögum ekki gert athugasemdir við flóttamannahjálpina, svo hann vissi til, né talið hana skaða almenna félagsþjónustu sveitarfélaganna.

Slitnaði upp úr meirihlutasamstarfi

Sem kunnugt er slitnaði upp úr meirihlutasamstarfi Sjálfstæðisflokksins og Frjálslynda flokksins vegna fyrirhugaðrar komu 30 palestínskra flóttamanna frá Írak. Magnús Þór, sem þá var formaður félagsmálaráðs Akraness, gagnrýndi hvernig staðið var að málinu, sagði aðdraganda þess of skamman og að félagskerfið á Akranesi væri ekki í stakk búið til að taka á móti svo stórum hópi folks. Karen Jónsdóttir, þáverandi bæjarfulltrúi Frjálslynda flokksins, var ósammála afstöðu Magnúsar í málinu og gekk af þeim sökum til liðs við Sjálfstæðisflokkinn í bæjarstjórn og myndaði með honum hreinan meirihluta. Eitt af fyrstu verkum nýja meirihlutans var svo að samþykkja ályktun um að ganga til viðræðna við félagsmálaráðuneytið um móttöku flóttamannanna. Bæjarmálafélag frjálslyndra á Akranesi lýsti svo yfir stuðningi við Magnús fljótlega eftir að Karen klauf sig frá flokknum.

Ágreiningur hjá frjálslyndum?

Miðstjórn Frjálslynda flokksins samþykkti ályktun um helgina. Lýsti hún yfir fullum stuðningi við afstöðu Magnúsar Þórs í málinu. Þingflokkur Frjálslynda flokksins ályktaði svo um málið skömmu síðar þar sem sagði að frjálslyndir skorist ekki undan ábyrgð í málum flóttafólks og að Íslendingar eigi að vinna vel að mannúðar- og hjálparstarfi. „Stórefla á hjálparstarf annars vegar sem veitt er á erlendum vettvangi og hins vegar til þess að veita flóttamönnum móttöku hérlendis án tillits til kynþáttar eða trúarbragða þeirra. Þingflokkur Frjálslynda flokksins telur nauðsynlegt að jafnan sé vandað til verka þannig, að sú aðstoð, sem við veitum, nýtist sem best, sérstaklega þar sem þörfin er mest. Móttaka flóttafólks sem vandasamt og flókið verkefni sem krefst mikils og vandaðs undirbúnings og góðrar kynningar meðal íbúanna svo að sem víðtækust samstaða geti orðið um móttöku þess. Mikilvægt er til þess að tryggja góðan árangur, að sýna erlendum flóttamönnum að þeir séu velkomnir til landsins og til þátttöku í þjóðfélaginu svo þeir aðlagist því. Af þeirri gagnrýni, sem fram hefur komið, verður ekki dregin önnur ályktun en sú, að betur hefði mátt standa að málum varðandi væntanlega komu flóttafólks til Akraness. Hvetur þingflokkurinn stjórnvöld til þess að bætt verði úr nú þegar og að þau beiti sé fyrir góðri upplýsingagjöf um komu flóttamanna á þessu ári. Eðlilegt er að íbúalýðræði sé virkjað á Akranesi sem annarsstaðar við lausn mála,“ segir í ályktuninni.

Kristinn einn í málinu

Sigurjón Þórðarson, samflokksmaður Kristins og Magnúsar og fyrrverandi þingmaður frjálslyndra, skrifar um málið á heimasíðu sína. Þar segir hann að þrír af átján hafi greitt atkvæði gegn ályktun miðstjórnar Frjálslynda flokksins. Einn þeirra sem hafi verið á móti hafi verið Kristinn. Í pistlinum vitnar Sigurjón til orða Kristins sem hann lét falla í fréttum Ríkisútvarpsins um helgina þar sem Kristinn sagði svo virðast sem ágreiningur væri innan flokksins um málið. „Það er mér algerlega óskiljanlegt hvernig Kristni geti dottið í hug að túlka atburði föstudagsins með þeim hætti að það sé uppi ágreiningur á milli miðstjórnar og þingflokks Frjálslynda flokksins. Miklu nær væri að halda því fram að Kristinn ynni markvisst að því að kljúfa sig frá þingflokki og miðstjórn Frjálslynda flokksins, sérstaklega í ljósi þess að í sömu mund og miðstjórnarfundurinn hófst á föstudag setti hann út grein á heimasíðu sína sem má túlka sem árás á afstöðu formanns og varaformann Frjálslynda flokksins í málinu,“ segir Sigurjón.

Magnús Þór segist ekki vita hvað Kristni gengur til með framgöngu sinni. „ Kristinn hefur ekki á neinum tímapunkti reynt að ræða málið við mig. Það kom mjög á óvart að hann skyldi allt í einu taka þessa opinberu afstöðu eftir að hafa þagað um málið dögum saman, fyrir utan að hann tjáði sig almennt um það í Silfri Egils án þess að lýsa yfir andstöðu eða gagnrýni þar. Ég held að mjög fáir í flokknum séu sammála Kristni. Að minnsta kosti hef ég ekki orðið var við þann hóp. Kristinn var einn á móti ályktun þingflokks Frjálslynda flokksins um málið á meðan hinir þrír voru henni samþykkir,“ segir Magnús Þór.

Magnús segir jafnframt framgöngu Kristins mjög alvarlega þar sem sem þingflokksformanni beri honum að sætta andstæður innan flokksins, ekki reyna að kveikja elda og hella olíu síðan á þá.

Heimild: dv.is (http://dv.is/frettir/lesa/9353)

Grímuklæddir Ítalir brutu verslanir innflytjenda

25. maí 2008

Lögreglan á Ítalíu fordæmdi í dag árásir á verslanir í eigu innflytjenda frá Bangladesh og Indlandi í Róm, þar sem um 20 grímuklæddir menn með kúbein voru að verki, að því er fréttastofan ANSA greindi frá. Einn árásarmannanna bar einnig á sér hakakrossmerki.

 

Árásarmennirnir fóru ennfremur niðrandi orðum um kynþætti verslunareigendanna og sögðu þeim að fara heim. Að sögn lögreglunnar lágu ekki pólitískar hvatir að baki árásunum heldur eru þær til marks um tortryggni í garð innflytjenda.

 

Gianni Alemanno, borgarstjóri í Róm, fordæmdi árásirnar og sagði að eina ráðið til að koma í veg fyrir að atburðir sem þessir endurtækju sig væri að setja strangari reglur um innflytjendur.

 

Innflytjendamál voru ofarlega á baugi fyrir þingkosningarnar í landinu í apríl. Silvio Berlusconi forsætisráðherra sagði um síðustu helgi að afdráttarlaus afstaða stjórnar sinnar væri réttlætanleg, eftir að greint var frá ýmsum ráðstöfunum til að stemma stigu við fjölda innflytjenda. Sagði Berlusconi að Ítalir ættu rétt á að þurfa ekki að óttast glæpastarfsemi innflytjenda.

 

Heimild: mbl.is (http://mbl.is/mm/frettir/erlent/2008/05/25/grimuklaeddir_italir_brutu_verslanir_innflytjenda/)

Segir að Íslendingar eigi að gæta að hag flóttamanna

23. maí 2008

 

„Í stefnuskrá Frjálslynda flokksins er vikið að málefnum flóttamanna og þar er lýst yfir stuðningi við því að bjóða þeim til búsetu og dvalar hér á landi," segir Kristinn H. Gunnarsson, þingmaður Frjálslynda flokksins, í nýjum pistli á vefsíðu sinni. Hann segir að Íslendingar eigi að beita sér af myndarskap í mannúðar- og hjálparstarfi hvort, sem er á innlendum eða erlendum vettvangi. Ríkisstjórn og Alþingi eigi að setja mun meira fjármagn til málaflokksins á komandi árum en verið hefur til þessa.

Eins og kunnugt er var hart deilt um innflytjendamál á Akranesi fyrr í maí vegna hugmynda um að bærinn tæki við flóttamönnum frá Palestínu. Deilurnar náðu hámarki þegar upp úr meirihlutasamstarfi Sjálfstæðisflokks og frjálslyndra á Akranesi slitnaði. Það gerðist þegar Karen Jónsdóttir bæjarfulltrúi sagði sig úr Frjálslynda flokknum og gekk til liðs við sjálfstæðismenn.

„Erlendis blasa verkefnin við hvert sem litið er svo sem í Palestínu, Írak eða Darfur, svo nokkur dæmi séu nefnd sem ofarlega hafa verið á baugi síðustu vikur og eru lýsandi fyrir það hve skortur og neyð bjargarlauss fólks er yfirþyrmandi. Það er verðugt verkefni fyrir Íslendinga að beita sér í auknum mæli fyrir bættum hag flóttafólks. Þegar í stað á að auka stórlega fjármagn til málaflokksins og verja því til þess að efla annars vegar hjálparstarf sem veitt er erlendis og hins vegar til þess að taka á móti flóttamönnum hér á landi," segir Kristinn á vef sínum.

 

Heimildir: visir.is (http://visir.is/article/20080523/FRETTIR01/976731183)