Húðflúraði hakakross á barn

13. jan 2009

Húðflúrunartæki karlmanns á þrítugsaldri voru gerð upptæk eftir að upp komst að hann hefði húðflúrað börn undir lögaldri. Meðal annars húðflúraði maðurinn hakakross á eitt barnanna. Þetta kemur fram á vef Bæjarins besta.

 

Lögreglunni á Vestfjörðum barst ábending um málið og gerði tæki mannsins umsvifalaust upptæk. Maðurinn húðflúraði ísfirsk börn undir lögaldri og án samþykkis foreldra þeirra. Mörg hver eru húðflúrin á áberandi stöðum, t.d. á fingrum. Samkvæmt frétt BB eru foreldrar barnanna slegnir enda getur reynst afar kostnaðarsamt að fjarlægja húðflúr.

 

Heimild: mbl.is (http://mbl.is/mm/frettir/innlent/2009/01/13/hudfluradi_hakakross_a_barn/)

Atvinnuleysi 4,8% í desember

13. jan 2009

Skráð atvinnuleysi í desember 2008 var 4,8% eða að meðaltali 7902 manns og jókst atvinnuleysi um 45% að meðaltali frá nóvember samkvæmt tölum, sem Vinnumálastofnun birti í dag. Hefur  atvinnuleysi ekki verið jafn mikið frá því í janúar árið 1997.

 

Á sama tíma á árinu 2007 var atvinnuleysi 0,8%, eða 1357 manns. Vinnumálastofnun segir, líklegt  að atvinnuleysið í janúar 2009 muni aukast verulega og verða á bilinu 6,4% ‐ 6,9%.

 

Atvinnuleysi í desember var mest á Suðurnesjum, 9,7% en minnst á Vestfjörðum, 1%. Atvinnuleysi jókst um 46% á höfuðborgarsvæðinu og um 44% á landsbyggðinni. Atvinnuleysi jókst mun meira meðal karla eða um 56% en um 29% meðal kvenna. Ástæða þess er m.a. meiri samdráttur í greinum sem karlar starfa í t.d. í byggingariðnaði.

Þeir sem verið hafa á skrá lengur en 6 mánuði voru 700 í lok desember en 610 í lok nóvember. Alls höfðu 255 verið atvinnulausir lengur en eitt ár í desember sem er svipað og í lok nóvember. Vinnumálastofnun segir, að þegar atvinnuleysi aukist eins mikið og nú sé mesta aukningin meðal þeirra sem hafi verið atvinnulausir í nokkrar vikur og mánuði.

Atvinnuleysi ungs fólks hefur aukist meira en þeirra eldri og hefur 16‐24 ára atvinnulausum fjölgað úr 1.408 í lok nóvember í 2.069 í lok desember og eru þeir um 23% allra atvinnulausra í desember.

 

Skýrsla Vinnumálastofnunar

 

 

 

Heimild: mbl.is (http://mbl.is/mm/frettir/innlent/2009/01/13/atvinnuleysi_4_8_prosent_i_desember/)

3.500 fyrirtæki í þrot?

09. jan 2009

Tæplega 3.500 fyrirtæki stefna í þrot innan tólf mánaða sé miðað við núverandi stöðu. Það sýna útreikningar fyrirtækisins Creditinfo á Íslandi. „Þegar ég segi þrot er ég að tala um að þau verði gjaldþrota eða gert verði í þeim árangurslaust fjárnám,“ segir Rakel Sveinsdóttir, framkvæmdastjóri fyrirtækisins.

 

Hún segir fyrirtækin flest á höfuðborgarsvæðinu, þau séu í öllum atvinnugreinum, lítil sem stór og í fullri starfsemi. Mest áberandi séu byggingarfyrirtæki og verslunar- og þjónustufyrirtæki. „Ef við berum þessa tölu saman við árin á undan er þetta mikil aukning frá árinu 2008 og 200 prósenta aukning frá árinu 2007.“ Fyrirtækin séu ekki í hópi með þeim sem séu í alvarlegum vanskilum, heldur við gjaldþrot verði ekki gripið til róttækra aðgerða.

 

Um 30 þúsund fyrirtæki eru í landinu. „Hafa þarf í huga að inni í þeirri tölu eru allar fyrirtækjakennitölur, hvort sem þær heyra eignarhaldsfélögum til eða svokölluðum skúffufyrirtækjum. Eflaust á það síðarnefnda við um einhver þessara nær 3.500 fyrirtækja en upp til hópa eru þetta ekki þau,“ leggur Rakel áherslu á. Creditinfo á Íslandi rannsakar nú hversu mörg þessara þrjátíu þúsund fyrirtækja eru virk.

 

Útreikningana lagði Rakel fram á fundi sjálfstæðismanna sem auðlindahópur Evrópunefndar Sjálfstæðisflokksins stóð fyrir í Valhöll í gær.

 

Nánar í Morgunblaðinu. Smelltu hér til að gerast áskrifandi.

Heimild: mbl.is (http://mbl.is/mm/frettir/innlent/2009/01/09/3_500_fyrirtaeki_i_throt/)

Hópslagsmál í Lönguhlíð

07. jan 2009

Lögreglunni í Reykjavík tókst að skakka leikinn þegar tveimur hópum  með barefli lenti saman í Lönguhlíð í kvöld. Samkvæmt tilkynningunni sem lögreglunni barst fyrir um hálfri klukkustund var um útlendinga að ræða.

 

Enginn slasaðist í slagsmálunum, að því er lögreglan greinir frá. Hún segir að rætt hafi verið við slagsmálahundana á staðnum og þeir síðan haldið sína leið.

 

 

 

Heimild: mbl.is (http://mbl.is/mm/frettir/innlent/2009/01/07/hopslagsmal_i_longuhlid/)

Íslendingar aldrei verið svartsýnni

03. jan 2009

Íslendingar eru yfirleitt svartsýnir á horfur ársins 2009 og hafa aldrei verið jafn svartsýnir frá því mælingar hófust, samkvæmt niðurstöðum könnunar Gallup sem gerð var undir lok síðasta árs. Könnunin var gerð í 46 löndum.

 

Um 67% Íslendinga töldu að persónulegir hagir þeirra yrðu verri á árinu 2009 en þeir voru í fyrra. Tæplega 30% töldu að persónulegir hagir þeirra yrðu svipaðir og á nýliðnu ári en aðeins 4% væntu batnandi hags fyrir sig.

 

Viðhorf til efnahagsástands á komandi ári hefur aldrei mælst jafn neikvætt og það mældist í lok síðasta árs. Rúmlega 90% Íslendinga töldu að efnahagsástandið yrði verra á árinu 2009 en það var á árinu 2008, 6% töldu að það yrði svipað bæði árin og aðeins 3% áttu von á að það myndi batna. Þá töldu 93% að atvinnuleysi ætti eftir að aukast á árinu 2009. Hlutfall þeirra sem voru þessarar skoðunar hefur hækkað um 46 prósentustig frá síðustu mælingu. Hins vegar töldu 4% að atvinnuleysi yrði svipað á þessu ári og það var í fyrra en 2% minna.

 

31% óttast atvinnumissi

 

Þegar spurt var um atvinnuhorfur launþega, ýmist í fullu starfi eða hlutastarfi, töldu tæplega 69% Íslendinga sig vera í öruggri vinnu en 31% taldi líkur á atvinnumissi. Á síðasta ári voru 12% á því að þau gætu orðið atvinnulaus. Um 47% Íslendinga töldu að það myndu taka stuttan tíma að finna nýja vinnu en jafn stór hópur taldi að það gæti tekið langan tíma.

 

Þegar á heildina er litið má segja að almennt ríki svartsýni gagnvart árinu 2009. Íslendingar skipa sér á bekk með íbúum Vestur-Evrópu sem eru líkt og áður þeir svartsýnustu í heimi hér.

 

Niðurstöður þessar fengust með netkönnun sem gerð var 25. nóvember til 1. desember í fyrra. Úrtaksstærð var 1.874 manns á aldrinum 18-75 ára af öllu landinu úr viðhorfahópi Capacent Gallup. Svarhlutfall var 65%.

 

Nánar í Morgunblaðinu. Smelltu hér til að gerast áskrifandi.

Heimild: mbl.is (http://mbl.is/mm/frettir/innlent/2009/01/03/islendingar_aldrei_verid_svartsynni/)