Það eru Alþjóðahús, ASÍ, Efling, Samtök verslunar og þjónustu og VR sem standa fyrir átakinu og verður því hleypt af stokkunum í dag með útgáfu fjölmargra barmerkja sem útlendingar verða hvattir til að nota.

Á þeim stendur meðal annars: Ég er að læra íslensku, íslenska er mínar ær og kýr, er íslenska ekkert mál? og hvernig á að fallbeygja kýr. Átakið kemur í kjölfar töluverðrar umræðu í samfélaginu um fjölgun erlendra starfsmanna hér á landi, ekki síst í þjónustustörfum, og miklvægi þess að kenna þeim íslensku. Bent er á í tilkynningu frá Alþjóðahúsi að afgreiðslufólki sem talar enga eða litla íslensku fjölgi ört vegna þess að verslunum hafi gengið illa að manna að fullu störf í afgreiðslu með innlendu launafólki.

Með barmmerkjunum á að minna Íslendinga á að það tekur tíma að læra nýtt mál og virkja þá í að kenna útlendingum íslensku. Þannig hvetja félögin fólk til að tala ekki ensku að fyrra bragði og að gefa sér tíma til að hlusta og eiga samræður á íslensku þrátt fyrir takmarkaðan orðaforða viðmælanda.

Barmmerkjunum verður dreift til aðildarfélaga ASÍ og aðildarfyrirtækja Samtaka verslunar og þjónustu um allt land og til símenntunarmiðstöðva. Þá verður hægt að hafa samband við Alþjóðahúsið, ASÍ, Eflingu eða VR til að fá fleiri merki.

Tíðar nauðganir síðustu vikur hafa vakið mikinn óhug í samfélaginu. Svo virðist sem nauðganir á götum úti veki upp enn meiri ótta og óhug en nauðganir sem eiga sér stað í heimahúsum, sem einmitt er tilvikið um mikinn meirihluta nauðgana. Í umræðunni er tekist á við ýmsar staðlaðar hugmyndir og einnig fordóma.

Tvær nauðganir voru kærðar eftir fyrri helgi, en báðar áttu sér stað úti á götu og gerendur voru útlendingar.

Í hita þeirrar umræðu vill gleymast að flestar nauðganir eiga sér stað á heimilum og það sem meira er, að gerandi og fórnarlamb eru iðulega kunnug. Í þeim tilvikum eru gerendur langoftast Íslendingar enda sýna tölur að erlendum gerendum í kærðum kynferðisbrotamálum hefur ekki fjölgað jafnmikið og útlendingum hefur fjölgað í landinu. Útlendingum hefur því fækkað hlutfallslega sem gerendum í kynferðisbrotamálum.
Önnur stöðluð hugmynd sem er uppi á borðinu í umræðunni um nauðganir snýr að tengslum nauðgunar og kynhvatar.

Nauðgun er hreint og klárt ofbeldi og á ekkert skylt við kynhvöt eða kynlíf yfirleitt. Nauðgun er hins vegar skyld öllu mögulegu öðru ofbeldi, svo sem barsmíðum og manndrápum.

Sem betur fer virðist orðræðan um konuna sem býður heim nauðgun með klæðaburði eða einhvers konar meintri áhættuhegðun vera á undanhaldi. Fólk gerir sér grein fyrir því að fórnarlamb nauðgunar getur aldrei kallað yfir sig þann verknað. Hver einstaklingur á rétt á að vera klæddur eins og honum sýnist og vera þar sem honum sýnist þegar honum sýnist. Þetta á jafnt við um konur og karla.

Hvað verður til þess að ungur maður tekur sig til og nauðgar vinkonu sinni eða kunningjakonu? Hver er virðing þess unga manns fyrir vinum sínum? Hvernig kennir maður fólki að bera virðingu fyrir öðrum? Það er jú ljóst að sá sem ber virðingu fyrir náunga sínum fer ekki út og nauðgar honum eða lemur.

Nauðgun er samfélagsmein sem ekki verður upprætt nema með þeirri hugarfarsbreytingu að samskipti manna á milli fari ekki fram með því að neyta aflsmunar. Menn eru vitsmunaverur og á mörgum sviðum tekst þeim mjög vel upp að nota vit sitt og samskiptahæfileika, einnig til að leysa úr ágreiningi og fá útrás fyrir vanlíðan. Þessa hæfileika mannskepnunnar þarf að rækta enn betur en nú er gert.

Þarna liggur rót vandans. Það verður að hætta að eyða orkunni í að tala um einmana útlenska karla og skort á tækifærum til að fá útrás fyrir kynhvötina. Þessar hugmyndir verða að fara sömu leið og hugmyndirnar um áhættuhegðun kvenna, sem eru óðum að hverfa.

Það verður að skoða hvað gerist frá því að lítill og saklaus drengur heldur af stað út í lífið þar til hann er orðinn að ofbeldis­manni sem fær útrás fyrir vanlíðan sína með því að nauðga konu. Sem betur fer lendir aðeins örlítill hluti karlmanna á þessum stað en við látum ekki staðar numið fyrr en enginn er eftir í þeim hópi.

Bandarískur talsmaður þjóðernishyggju - sem hvetur til ofbeldis gegn minnihlutahópum - segir marga Íslendinga aðhyllast skoðanir sínar. Höfundar íslenskrar vefsíðu sem hann hýsir hafa í hótunum við nafngreint fólk á síðunni. Fréttamanni Stöðvar tvö var hótað þegar óskað var eftir viðtali.

Á vefsíðunni skapari.com er þjóðernishyggja og andúð á ýmsum minnihlutahópum aðal umfjöllunarefnið. Þar er meðal annars að finna lista yfir svokallaða óvini Íslands - nafngreinda kynþáttasvikara eins og síðuhöfundar nefna þá - þar á meðal forseta Íslands og konu hans.

Síðan er til rannsóknar hjá lögreglu en enginn hefur enn verið færður til skýrslutöku vegna hennar.

Það er mottó síðunnar að „ef maður geti hugsað það geti maður sagt það." Þeir sem skrifa á skapari.com hafa hugsað ýmislegt og skrifað um það - en ekki undir nafni.

Hægt er að óska eftir viðtali við höfunda í gegnum síðuna en þeir óska nafnleyndar. Þegar fréttastofa hafði samband var svarið að enginn fjölmiðill fengi viðtali - þeim væri ekki treystandi miðað við hvernig fjölmiðlar erlendis hagi sér. Allir værum við settir undir sama hatt því höfundar síðunnar væru jú fordómafullir.

Fréttastofa hafði samband við Hal Turner - einn helsta talsmann þjóðernishyggju í Bandaríkjunum - sem heldur úti síðunni. Hann sagði síðuna hafa verið óaðgengilega í dag vegna mikilla heimsókna á hana frá Íslandi eftir að umfjöllun fjölmiðla hófst. Öflugur eldveggur í kerfi hans hafi tekið því sem árásum þeirra sem vildu skemma síðuna og því lokað á íslenskar ip-tölur.

Fréttastofa Stöðvar 2 óskaði í tölvupósti eftir viðtali við Hal Turner. Hann vildi ekki tala - sagði það reynslu sína að snúið yrði úr orðum sínum og síður hans sagðar fullar af hatursáróðri. Í svari sínu í tölvupósti bætti því við að vaxandi og dyggur hópur Íslendinga styddi skoðanir hans og skrifar svo:

„Ef frétt þín verður röng eða villandi get ég sent helstu ófriðarseggi úr þessum hóp í heimsókn til þín til að láta í ljós óánægju mína. Treystu mér þegar ég segi þér að þú vilt ekki hafa mig fyrir óvin."

Íslenskuskor Háskóla Íslands hyggst bjóða upp á hagnýtt námskeið í íslenskukennslu fyrir útlendinga á vorönn vegna þess hve nemendur skorarinnar eru orðnir eftirsóttir sem íslenskukennarar hjá fyrirtækjum. Námskeiðið er sett á laggirnar að frumkvæði nemenda.

Íslenskuskor og Mímir, félag stúdenta í íslenskum fræðum, standa fyrir íslenskuhátíð í Árnagarði í dag í tilefni dags íslenskrar tungu. Þar verða meðal annars kynnt tvö námskeið sem íslenskuskor hyggst bjóða upp á fyrir þá sem vilja kenna innflytjendum íslensku.

Þóra Björk Hjartardóttir, dósent við íslenskuskor, segir að bæði námskeiðin verði á BA-stigi. Annað námskeiðið er fræðilegt og nefnist Nýtt mál og ný menning. Þar verður íslensk menning skoðuð út frá sjónarhóli útlendinga og hvernig og hvenær útlendingar geta tekið þátt í samskiptum og umræðum í íslensku samfélagi.

„Hitt námskeiðið er hagnýtt og þar ætlum við að kenna íslenskunemum að kenna íslensku sem annað mál, meðal annars hvernig á að búa til kennsluefni," segir Þóra Björk. Hún segir námskeiðið sett á laggirnar að frumkvæði íslenskunema. „Það hefur færst í aukana að fyrirtæki falist eftir því við stúdenta að þeir komi og kenni útlendingum íslensku og við erum að bregðast við því," bætir Þóra Björk við og segir þetta svar íslenskuskorar við kröfum fjölmenningarsamfélagsins.

Aðspurð hvort skortur sé á íslenskukennurum fyrir útlendinga segir Þóra Björk svo vera, sérstaklega menntuðum kennurum. Með þessu námskeiði vilji skorin reyna að auka menntun kennaranna og gera kennsluna þannig markvissari. Skráning í námskeiðið er ekki hafin og því liggur ekki fyrir hversu margir munu sitja það en Þóra á von á góðri þátttöku í ljósi þess að nemendur óskuðu eftir því að námskeiðið yrði sett á laggirnar.

Sem fyrr segir stendur skorin og félag íslenskunema fyrir íslenskuhátíð í dag í tilefni dags íslenskrar tungu. Þar verða námskeiðin kynnt, menntamálaráðherra flytur ávarp og rithöfundar, fræðimenn og nemar flytja erindi um tunguna. Hátíðin hefst klukkan 16 og verður í stofu 201 í Árnagarði.